ريشة الفنان الكبير : مصطفى الشيخ
تأليف : عاصم صلاح الدين
أنا هريدى سداد… للي يعوزو
عنتر لما جاني حزين لاوي بوزو
حمايا يا هريدى راجل مفتري
المفروض إنه للرجال يشتري
قال عايز مهر عبلة
ألف ناقة……. أوزو
قلت له يا أبو العناتر
لا تشيل الهم
يالا على حماك
أنا أخليه يفهم
ركبنا الفلوكة
عنتر حزين مغتم
وصلنا لأبو عبلة
لقيناه بيسمع ” إليسا”
مندهش…. مهتم
قلت له ايه يا عم ” مالك”
عيب عليك.. إتلم
عايز ألف ناقة
خلي عندك دم
الألف ناقة ها تأكلهم منين
يا فالح قوللي ها يعيشوا فين
دي شقتك دي صالة و غرفتين
سيبك من الجمال و النوق
إهدي شوية و معايا روق
” عبولة ” دلوقتي سنها كبر
عنتر ولدنا شاري و مصطبر
أنا جبت لك بدل الجمال
ألفين علبة” بخور ”
تفرش بيهم في” الحسين ”
عالقهاوي بيهم تدور
وعلشان عبلة زينة الصبايا
جبت لك معايا
ولاعة ببطارية حكاية
عشمي يا ابو عبلة تقبلهم
دا النبي الغالي قبل الهدايا
شافهم و قال يا سلام يا عيني
من زمان نفسي ف ولاعة صيني
موافق و تشكر على البخور
بس عنتر عليه الكعك و البتي فور
الفرح يكون في ” فورسيزون” العبور
قلت يا عمي كله يهون
قال و إليسا تغني
أجمل ” نسناس” في الكون
عنتر إتنرفز.. غمزته بالعيون
قلت يا عمي كله يهون
هدية مني ” دش” و ” تليفزيون”
عنها و سمعنا الطبل و الزغاريد
كل القنوات نقلت
الفرح السعيد
جاملونا الحبايب كلاكسات و سارينة
شهر العسل كان شهرين
شهر ف ” شرم” و شهر ف ” مارينا”
